إحنا نعرف عن الفترة الملكية فعلًا ؟

الفترة دي اتفرجت على فيلمين مُحببين جدًا ليا ومن أهم الأفلام في تاريخ السينما المصرية، فيلم ‫الأيدي الناعمة‬ و فيلم ‫‏الأرض‬.
الفيلمين في عامل مشترك بينهم هو الطابع السياسي، بيناقشوا موضوع الملكية والجمهورية وقد اية الملكية شئ ظالم وقامع للمصرين، *الفيلمين اتعملوا في عهد عبد الناصر*.

الأول عن البرنس شوكت اللي بينتمي للطبقة الأرستقراطية اللي بيعامل كل اللي مش بينتموا لطبقته أنهم رعاع وكائنات طفيلية وطرد بنته علشان إتجوزت واحد من "عيلة واطية" زاي ما كان بيوصفهم.

والفيلم التاني محمود بك الإقطاعي الطماع اللي سبب ضرر لأراضي الفلاحين وعاوز يعمل سكة تودي للسرايا بتعته.
النموذجين بيمثلوا الجانب السئ من فترة الملكية أو بيصوروها أنها فترة "سودة" مفيهاش إلا سلبيات، و أنا مش مع أو ضد الفترة دي لأني ببساطة معشتش فيها علشان أحكم وحتى لو عشت برده مش هقدر أحكم سواء كانت فترة أغلبها عز ونغنغة ولا فترة قمع و ظلم للشعب، إحنا منعرفش عن الفترة دي إلا اللي عاشوا في الفترة دي عاوزين يعرفوه لينا، مقرناش إلا اللي هم عاوزين ينشروه في الكتب و الصحف، سواء عبد الناصر و شلته اللي بكل شكل من الأشكال صوروا إنها كانت فترة مهببة، أو سواء من الجانب التاني اللي كان بينقل الصورة المضادة للموضوع و أن البلد كانت عِز و جيه عبد الناصر وعصابته وخربها.

بمناسبة الموضوع دة فكرني بحاجة تانية في نفس السياق برده، هو يا ترى بعد 50 سنة الأجيال اللي بعدنا هيقولوا علينا إية ؟ ويوصفوا الفترة اللي إحنا فيها خلال الـ 5 سنين دي بكل ما فيها بإية؟
الموضوع هيكون صعب لأن حتى إحنا مش عارفين نحكم اللي حصل من سنة ولا سنتين ده كان إية ؟.

بالرغم من إننا عايشنا وعاصرنا الأحداث، نفس الشئ بيحصل معانا دلوقتي مش عارفين عن حق إية الأوضاع وحقيقة الأمور كانت من 60 ولا 70 ولا 80 سنة، وهل أصلًا حتى الناس اللي كانوا عايشيين في الفترة دي زاينا برده معرفوش يوصفوا الأمور بطريقة صح أو أقرب للصح، إحنا بكل اللي إحنا فيه في قمة التقدم التكنولوجي في وسائل الإعلام و الاتصال وثورة المعلومات وبرده في حاجات كتير جدًا مش فاهمنها وغايبة عننا، هل بقى يا ترى زمان في الفترات اللي ذكرتها كانوا قادرين فعلا يدركوا كل شئ و يوصفوا الحاجات و الأحداث فعلا؟
برده أعتقد أن بعد 60 ولا 70 سنة هيوصلوا لتقدم أكتر و أكتر في تكنولوجيا الإعلام والاتصال وبرده مش هيعرفوا إية اللي حصل في الماضي في 1952 وقبلها أو حتى 2011 و2013.