لية بحب الرياضة؟
الرياضة من ضمن الحاجات البسيطة في الحياة اللي بتسعد الإنسان وبتلغي الفروق بين البشر هي لغة تقارب بينهم أوالمفروض إنها تعمل ده، تسعد البشر وتخلي بينهم روح جميلة تخلي في "روح رياضية"،
الرياضة زاي المزيكا زاي الفنون والعلم، رسالة بتدعوا للحب والسلام والتقارب، فإجراء مباراة في رياضة ما مثلًا كرة القدم بين بلدين أعداء أو مدنتين أو مجموعتين هو شئ مش مُحبب للبعض اللي مش عايز سلام لأن الرياضة تأثيرة قوى و بيدوم،
الرياضة بتصلح ما يفسده السياسة، أحيانًا بتكون الرياضة أداة في إيد السياسيين، لكن غالبًا ما تكون الرياضة هي الأقوى والأقرب لقلوب البشر.
في أولمبياد ريو دي جانيرو في أكتر من حاجة جميلة حصلت بتأكد إن الرياضة بتتخطي حاجز الجغرافيا وبتكسر حواجز القومية والدين و العرق والحدود السياسية بين الناس وبتجمعهم كلهم من كل أنحاء الكوكب في مدينة واحدة بيتنافسوا تنافس راقي في عشرات الرياضات المختلفة.
بتقرب العالم من بعضه
وجود أكتر من 10 ألاف رياضي من 206 دولة، يعني تقريبًا من كل دول العالم المعترفة بيها "الدول اللي ليها حكم ذاتي مش بتشارك في الأولمبياد"، دول العالم كلها بتشارك وبيتناسوا الخصومات السياسية بينهم والفروق العرقية والإثنية والدينية والثقافية والجغرافيا كمان، ده شئ جميل فعلًا وبيخليني أحب الرياضة لأنها بتقرب.
منتخب اللاجئين
من أروع الحاجات في أولمبياد ريو بالفعل هو الفريق ده، 10 أشخاص بترجع أصولهم لـ 4 دول مختلفة، اتشتتوا واتهجروا من بلادهم دي بسبب دوافع الحرب والظروف القاسية، لكن الرياضة أتاحت ليهم الفرصة إنهم يوروا ويعرضوا للعالم قدراتهم الرياضية ويكونوا منتخب واحد وبينافسوا مع غيرهم، شئ ممتاز وحتى نفسيًا عليهم حتى ولو مأحرزوش أي ميداليات او مراكز أعتقد إن كون أن الفرصة أتاحت ليهم دي في حد ذاتها سعادة كبيرة، وكمان دفعة كبيرة معنوية لغيرهم من اللاجئين والمهاجرين حول العالم، إن ممكن يخدوا فرصة ممالثة، فبتخلق فيهم ثقة في نفسهم إنهم يبدعوا ويتميزوا في المجالات المختلفة.
سيلفي الكوريتين
السيلفي المفاجأة، مفاجاة حلوة جدًا وبتخلي الأمل يدب في القلب تاني إن الحب والسلام بيتخلل في شقوق جدار الكراهية السياسية ما بين الكوريتين الجنوبية والشمالية، السيلفي اللي أخدته لاعبتين الجمباز الجنوبية لي يون جو والشمالية هونج اون جونج، السيلفي دة بيقول إن لسة في أمل وهيتكرر وبيتكرر كتير مواقف زاي دي لإثبات إن هيجي يوم و الكوريتين هيتلم شملهم تاني، وأعتقد إن الرياضة هتساهم كتيررر جدًا في حدوث ده.
لأنها هي الحب والسلام علشان كدة بحبها..
تعليقات
إرسال تعليق