الأجبان المصرية.. أنواعها وتاريخها
مِش صعيدي
الأجبان من الأكلات الأساسية على طبلية المصريين من آلاف السنين، اختلفت أنواعها وأشكالها ومذاقاتها
وأقدم اكتشاف للجبنة في تاريخ مصر، ومن الأقدم في العالم، كان في مقبرة سيدة بمنطقة سقارة بيرجع تاريخها لـ4750 سنة
وفي 2018 تم اكتشاف بلاص جبنة كان في مقبرة النبيل بتاحمس اللي بيرجع لسنة 1200 قبل الميلاد، يعني عمر الجبنة دي 3200 سنة، وأظهر التحليل أن الجبنة دي مصنوعة من حليب الأغنام والماعز
 |
| جبنة مصرية عمرها 3200 سنة |
حاليًا.. مصر اتميزت بـ4 أنواع جبنة مصرية أصيلة بتتصنع حصريًا فيها ، بجانب عشرات الأنواع التانية اللي موجودة في مصر لكنها مش مصرية بالأساس مش هنبالغ لو قولنا إن ممكن كل محافظة أو كل قرية كمان ليها جبنة بمذاق مختلف عن التانية
وتعتبر الجبنة القريش أقدم أنواع الأجبان المصرية، وبترجع لعهد المصريين القدماء، وأكتر نوع جبنة منتشر في أنحاء مصر
وفي كمان الجبنة الدمياطي، اللي كانت بالأساس بتتصنع في دمياط من قرون، ومنه انتشرت في مصر، وبتتصنع من لبن الأبقار أو الجاموس، أو من خليط منهم، وأحيانًا بتتعمل من لبن الغنم، وبتتسمى جبنة ضاني
النوع التالت، وهو الجبنة القديمة أو المِش، وهو مصري والمنتشر في قرى مصر في الوجه البحري في الدلتا والقبلي في الصعيد، وبيختلف مذاقه من مكان للتاني (مش صعيدي ومش فلاحي)
النوع الرابع والأخير هو الجبنة الرومي، وهو النوع اللي له شهرة برا مصر ومصر بتصدر منه كل سنة 5 آلاف طن، وموجودة في مصر من أكتر
من 1000 سنة، واتمصرت وأخدت الطابع المصري بإمتياز، وبيتسمى جبنة تركي في الإسكندرية لإن كانت غالبية المصانع اللي بتصنعه في الإسكندرية أتراك
ومن أشهر الأمور اللي تخص الجبنة الرومي، في فتوى تحريم أكله، بسبب الرسالة اللي قدمها الشيخ أبو بكر محمد بن الوليد الطرطوشي سنة 1126 م، لإن وقتها كانت الجبنة بيصنعها الروم وبتتصدر للإسكندرية، وحرمّها لأسباب دينية وسياسية واقتصادية
ولأجل كل دة، ظهرت فكرة مهرجان الجبن المصري اللي هيتم تنظيمه في شهر أكتوبر، عشان يكون أول مهرجان للأجبان في مصر، ويساعد على صناعة الأجبان دي اللي بيشتغل فيها 5 آلاف مصنع، وتاريخ صناعتها في مصر، وكمان ترويج صادراتها خارج مصر
#مصر_متعددة_الثقافات
#تراث_المطبخ_المصري
#الأكلات_التراثية_المصرية
المصادر:
- foodtodayeg.com
- al-ain.com
- www.skynewsarabia.com
- قناة مصر الزراعية التابعة لوزارة الزراعة
- الموقع الإلكتروني لقسم علوم وتكنولوجيا الألبان كلية الزراعة بجامعة الأزهر
تعليقات
إرسال تعليق