أنا مواطن سلبي

خلال أخر سنتين قولت أنا هكون مواطن سلبي جدًا
مجرد إنسان عايش وخلاص في مكان"مصر" لحد ما يلاقي فرصة سفر للخارج 
من بعد ما كانت معنوياتي في السمااااا من 5 سنين وبموت في تراب البلد لكن مع الوقت اكتشفت إن كل ده هبل في هبل
موت إيمان أحمد صديقتي واللي كنت بعتبرها اختي الصغيرة، في 14 أغسطس 2014، بسب السياسة أثر فيا جدًا وهز كياني، تقريبًا دي أكبر صدمة اتعرضت ليها في حياتي لحد دلوقتي،
وكانت صدمة خلتني أقرر بشكل "كان نهائي لكني تراجعت فيه للأسف" إني أبعد كل البعد عن السياسة لأنها شئ قذر بيسلب مننا أصدقائنا وسعادتنا وأوقاتنا وصحتنا ودمنا وحتى حياتنا،
من ساعتها قررت إني أكون إنسان سلبي مجرد بقضي وقتي وبس وكرهت البلد والناس،
وأقتصر حبي فيها في تاريخها وتراثها بس،
البلد لأنها ظالمة بتكره اللي بيحبها وبتحب وبتكبّر اللي بيسرقها وبينهبها وبيقتل في أولادها
والشعب لأنه بيعشق اللي يضربه على قفاه ومش بيتعلم ولا بيرفض ده بالعكس ده بيبرر الضرب على قفاه لنفسه إنه واجب وطني !!
منزلتش من بعد 14 أغسطس 2014 في أي شئ له علاقة بالبلد لا انتخابات ولا استفتاءات ولاوقفة ولا مظاهرة ولا أي مشاركة ليها علاقة إيجابية بالبلد بالرغم من إني قبل كدة كنت نشيط.
خلال الفترة اللي فاتت كنت بطنش وأكبر دماغي عن كل حاجة بتحصل وبقول أنا أضيع وقتي في المزيكا والفن أهو حاجة تضيعلي وقتي وتروقني وتغذي روحي،
لكن في شئ جوايا دفعني إني لازم أفكر في البلد 
مش دافع الوطنية لأني فعلًا مبقتش حاسس بالانتماء 
لكن كان دافع الشفقة على البلد وناسها 
إن البلد دي تستحق أحسن من كدة
وشعبها بكل البيض والسخافة اللي مليهاهم هم يستحقوا حياة أفضل.
موضوع الجزيرتين وتوابع الموضوع ده فعلًا خلاني أفكر قد إية البلد دي مغلوب على أمرها وقد إية الشعب ده اتدهور بيه الحال لوضع مأساوي،
لدرجة أنه بيبرر بيع أرضه عادي 
إللي كانت أعز ما يملكه بعد عرضه،
ومبقتش مستغرب إن اللي بيبرر بيع الأرض بكرة يببع شرفه وعرضه
وكله علشان أسطورة الاستقرار والدنيا تمشي والأمن والأمان والبتنجان
اللي ملوا دمغهم بيه في الإعلامي الأمنجي !
موقف حصل في جمعة الأرض وأنا مروح بعد ما نزلت أنا وأصحابي 
ماشيين في شارع جانبي من طلعت حرب لاقينا راجل عجوز هب فينا وأحنا ماشيين في أمان الله 
عمال يشتم شتايم وسخة والله يخربيوتكم خربتو البلد يا بتوع 6 أبريل.. إلخ
كان فعلًا مشهد كوميدي 
نموذج بيوصف الحال اللي وصل الشعب ككل، إن اللي بينزل علشان يدافع عن أرضه بيتهم بالعمالة وإنه "بيخرب" البلد وبتوع فساد !
أحنا عايشين في عبث وحتى تخطينا العبث بمراحل كتير!!
ولأن مفيش فايدة
فـ بعد موضوع الجزرتين ما يخلص هلجأ لكهفي ومزيكتي وفنوني المحببة ليا وهستكين لحد ما يحين وقت السفر من أم الدنيا..
لنا الله !