الإبل في السودان.. تاريخ وتجارة وحياة
بيرجع وجود الإبل في السودان للفترة ما بين 2500 و150 قبل الميلاد، وجات عن طريق البحر الأحمر من شبه الجزيرة العربية، ودة كان طريق أساسي لقدوم الإبل للقارة الأفريقية، بجانب الطريق التاني اللي كان من خلال البحر الأحمر برده لكن لمصر
الإبل بتنتشر في شرق وغرب السودان، وعددها بيفوق الـ 4.7 مليون جمل، ولها كذا نوع منها الرشايدي والبشاري والعربي والعنافي والميدوب، والسودان هي التانية عالميًا في إنتاج الإبل بعد الصومال اللي بتنتج 8 ملايين راس
الإبل بالنسبة للبدو السودانيين مش مجرد تجارة ووسيلة لكسب الرزق والعيش والاستفادة بمنتجاتها، فهي ليها دور اجتماعي كمان، فكل مازادت عدد الإبل اللي بيمتلكها الشخص والعشيرة زادت المكانة الاجتماعية له
بالنسبة للتجارة، فـ خط التجارة بين السودان ومصر هو أكبر خطوط تجارة الجمال في العالم، ومصر بتستحوذ على شراء 90% من إنتاج الإبل في السودان
فـ قوافل الجمال بتدفق للشَمال لمصر لأسواق دراو (في أسوان) وبرقاش (في الجيزة) لبيعها، وبدأت التجارة دي بين السودان ومصر وكمان السعودية بشكل رسمي في بدايات القرن العشرين، وغير رسمي من قبل كدة بكتير جدًا
أسعار الجمل في السودان متفاوتة بتتراوح ما بين 1300 و2000 دولار أمريكي، وفي إبل السباقات بتوصل أسعارها لـ300 ألف دولار، وحجم الدخل القومي السوداني من تجارة الإبل بيتراوح ما بين 150 و250 مليون دولار سنويًا
المصادر:
- https://bit.ly/2k48VVl
- https://bit.ly/2lDQ5EI
- https://bit.ly/2k48VVl
تعليقات
إرسال تعليق