جامع الأزهر قبلة لجذب البشر من أنحاء العالم

من 1048 سنة بالظبط كان في حدث كبير ومهم في القاهرة عاصمة الخلافة الفاطمية وهو إقامة أول صلاة جمعة في المسجد الأزهر 

واللي تم بناءه عشان يكون مركز لنشر مذهب الشيعة الإسماعيلية في قلب القاهرة اللي كانت عاصمة الطائفة الإسماعيلية في الوقت دة

مع الزمن والحقب المختلفة بقى المسجد الأزهر منارة علمية ودينية وكمان حاجة مهمة جدًا بالنسبة ليا وهو إنه مكان بيجمع البشر (كان في مسيحين بيدرسوا فيه زي المؤرخ المصري ميخائيل شاروبيم)  للدراسة والعلم من أنحاء العالم

وعبر التاريخ تم إنشاء أروقة للجنسيات والأعراق البارزة اللي كانت بتيجي تدرس في الأزهر، والأروقة دي هي المكان اللي عايشين فيه، وفي أوائل القرن الـ14 وصلت أعداد الأروقة دي لـ29

وكان بيسكن الطلاب في الحارات حولين الأزهر، وكان عددها 13 حارة وإتشالوا مع الوقت

والأروقة كانت بتتقسم قسمين، قسم الأروقة المصرية الستة اللي كان بيعيش فيها المصرين اللي بيجيوا من الأقطار المصرية من شمال وجنوب وشرق وغرب مصر، زي رواق الصعايدة ورواق الشراقوة.. إلخ 

والقسم التاني هو رواق الأجانب الوافدين

- رواق المغاربة، وكان موجود في شرق الجامع وجدده السلطان المملوكي قايتباي

- رواق الأتراك وفيه عاش الأتراك والمسلمين من الأقطار الأوربية

- رواق السفارية لأبناء السودان

- رواق الحديث للأحباش والشعوب المجاورين ليهم

- رواق البرناوية لأبناء النيجر والشعوب المجاورة ليهم في الغرب

- رواق صليح لأبناء تشاد

- رواق البرابرة لأبناء الشنقيط (مدينة موريتانية)

- رواق جنوب أفريقية

- رواق الحرمين الشريفين

- رواق اليمنية

- رواق البغدادية ودة لأبناء العراق وإيران والشعوب المجاورة

- رواق الهند

- رواق باكستان

 - رواق الأفغان

- رواق الأكراد

- رواق إندونيسيا والمجاورة ليها من الجزر والبلاد الإسلامية

- رواق الصين

- وكان في أروقة مش مخصصة لجنسيات معينة زي رواق الحنفية ورواق الحنابلة ورواق زاوية العميان، ورواق الجوهرية وغيرهم

وكان في رواق الشوام، وهو من أكبر وأزحم الأروقة ودة كان بيسكن فيه الشوام المجاورين اللي أسسه السلطان الأشرف قايتباي سنة 1496

والشوام عموما كانوا موجودين في مصر من قرون طويلة جدًا ونشطوا في كل المجالات الاقتصادية والثقافية والاجتماعية وكمان الدينية بنبوغ علماء شوام في الأزهر خلال العصر العثماني

وخلال الفترات دي كان في أسماء كبيرة في الأزهر في الإفتاء والعلوم الشرعية وإمامة المساجد، زي السيد الشريف شمس الدين محمد الحموي ومرعي بن يوسف أبي بكر المقدسي وأبي الحسن نور الدين علي المقدسي

ومن علماء الأزهر الشوام دول اتولوا مناصب كتير في الوظايف الإدارية في الدولة والعلمية والقضائية وبرعوا في مجالات مختلفة زي الطب