مين هما أقباط السودان وإية علاقتهم بمصر؟
النهاردة كان في احتفاء كبير بشخصية من ضمن أعضاء مجلس السيادة السوداني (الكيان الحاكم الجديد في السودان خلال المرحلة الإنتقالية) وهي المستشارة القانونية رجاء نيكولا عبد المسيح
ودة لكونها من مكون اجتماعي ديني في السودان عانى من تهميش هم أقباط السودان ولأول مرة من أكنر من 50 سنة شخصية قبطية تتولى منصب رفيع زي رجاء وكمان كونها سيدة فـ دى سابقة تاريخية
مين هما الأقباط السودانيين؟
أقباط السودان بيرجع أصولهم البعيدة للأقباط المصريين، وهما بالأساس من أصل مصري هاجروا للسودان خلال فترة الاضطهاد الديني في القرن الرابع الميلادي
في البداية هاجروا لمملكة النوبة في الوقت دة اللي كان فيها تسامح ديني، ومنها انتشروا لداخل السودان
مع الوقت الأقباط أخدوا وضعهم واشتتغلوا في مجالات كتير منها اللي متعلقة بالفلوس زي الصرافة والإدارات المالية والحسابات وكمان اشتغلوا في مجال التعليم والصحة والرياضة والطب والتجارة وغيرها من المجالات
خلال الفترات التاريخية فيمات بعد اتواصلت هجرات الأقباط المصريين سواء مسيحيين بالأساس أو مسلمين و"اتسودنوا" بقوا مواطنين سودانيين 100%
وكان أول منصب مرموق يتولاه قبطي مسيحي في السودان كان للدكتور موريس سدرة وأتولى منصب وزير الصحة في فترة سبعينات القرن العشرين
كل شيء بالنسبة للسودانيين الأقباط اتحول لكابوس ومرحلة من التمييز الديني العنصري بعد تولي نظام الجبهة الإسلامية الفاشية الحكم، وكانت البدايات بإصدار الرئيس المخلوع عمر البشير قرار إعدام طيار قبطي اسمه جرجس بتهمة حيازة فلوس أجنبية ومحاولة تهريبها برا السودان!
لكن كان السبب الحقيقي للواقعة دي هو استغلال الاختلافي الديني واللعب على وتر الطائفية الدينية والعرقية لتجييش وتقليب السودانيين ضد بعضهم
ومع مرور السنين اتواصلت الإساءات بداية من فرض لبس الحجاب على القبطيات في الجامعات والأماكن العامة وغيرها مع إنهم غير مسلمات لحد التكفير العلني للأقباط من على المنابر التابعة للنظام ووصفهم بـ"الصليبيين والكفار"
الأقباط السودانيين مواطنين وطنيين سودانيين شاركوا في أحداث الثورة في خلع البشير ونظامه الفاشي واتواجدوا في ميادين المدن السودانية
وبيتقاسموا مع باقي السودانيين في الاعتزاز بالهوية الوطنية حتى في أفراحهم ودة فيديو لفرح جميل جدا لعروسين من الأقباط السودانيين
https://www.youtube.com/watch?v=YMVysUC1EX4
الأقباط السودانيين مفيش تعداد رسمي محدد لهم لكن من المرجح إن عددهم بيتراوح ما بين 500 ألف و 1.5 مليون شخص
تعليقات
إرسال تعليق