بلد ريانا وثورة تحرير العبيد.. إية حكاية انفصال بربادوس عن بريطانيا؟
ريانا من أشهر الفنانين حولين العالم طبعًا ورمز وعلامة مهمة في صناعة المزيكا الحالية، وغالبًا يُعتقد عنها إنها أمريكانية إلا أنها بتنتمي لبلد لاتيني هي بربادوس وواخدة منصب سفير فوق العادة فيها
بربادوس جزيرة في شرق البحر الكاريبي، أعلنت إنها هتاخود خطوة تاريخية بانفصالها عن التاج البريطاني وتبقى جمهورية حرة في الذكرى الـ55 عيد الاستقلال في نوفمبر 2021
رغم إن بربادوس الأفريقية الأصول والهوى والنكهة دولة صغيرة جدًا مساحتها 431 كم بس وعدد سكانها 286 ألف نسمة لكنها بتمتلك تاريخ استعماري طويل ودموي
الأول كانت مستعمرة إسبانية وبرتغالية، بعد كدة وقعت تحت السيادة البريطانية سنة 1625 لحد استقلالها سنة 1966 يعني تم استعمارها 341 سنة
السنين دي معدتش بسلام وهدوء لكن حصلت ثورة ضخمة لسكان الجزيرة من العبيد بقيادة بوسا واللي اتعرفت الثورة/ التمرد دة باسمه
بوسا اتولد في غرب أفريقيا في مملكة أكان أو إيجبو وبعد استعمار مملكته تم استعباده ونقله لبربادوس وكان شغال حارس مزرعة ورغم إن كان له شوية امتيازات لكنه خطط لتحرير العبيد في بلده الجديدة بربادوس
قامت ثورة العبيد في بربادوس في أبريل سنة 1816 على إيد تقريبًا 20 ألف مع بوسا وخاضوا معارك ضد البيض أصحاب المزارع واتقتل منهم المئات والباقيين تم إعدامهم أو نفيهم للخارج، ورغم إحباط الثورة لكن تم إلعاء العبودية سنة 1834
وثورة بوسا تعتبر من أكبر الثورات التحريرية من العبودية في العالم وقتها سبقتها ثورة الجزير الغربية وبعد ثورة بوسا حصلت ثورة ديميرارا في جيانا وبعدها الثورة الكبرى في جامايكا من سنة 1816 لحد1831 واللي كان بوسا مُلهم ليهم
لحد دلوقتي بوسا يعتبر هو البطل الوطني والأسطوري الأول للبربادوسيين والشخصية التاريخية الرئيسية وله تمثال ضخم في العاصمة بريدج تاون
ورغم إن بربادوس بتتمتع باستقرار سياسي واقتصادي واجتماعي مع مستوى معيشة يعتبر عالي وكمان دولة تحت التاح البريطاني
لكن الحس القومي المتنامي للبربادوسيين مخليهم عاوزين يتخلصوا من الماضي الاستعماري القاسي، فأكتر من 95% من سكان الجزيرة هما من أصول أفريقية وهم أحفاد الناس اللي عانت في مزارع القصب زمان من مآسي العبودية
وعشان كدة من أيام قالت رئيس الحكومة البربادوسية في جلسة أمام البرلمان في بلدها الخطاب التاريخي وقالت فيه "جيه الوقت اللي نسيب ماضينا الاستعماري بالكامل وراءنا" ويقفلوا صفحة مريرة في تاريخ الجزيرة
المصادر:
- https://bit.ly/3mMfEPg
-https://bit.ly/2FPh6PU
- https://bit.ly/33JSm3F
-https://bit.ly/33Marho
تعليقات
إرسال تعليق