اللون البنفسجي.. من لبنان للعالم القديم وأغلى من الدهب
أصفر وأحمر وأزرق وأسود.. وألوان كتير بأشكال مختلفة بتميز الأعلام الرسمية للدول بينها وبين بعضها
ومن الحاجات الغريبة إن مفيش دولة مستقلة في العالم ما بين الـ 193 دولة اللي موجوديين، من ضمن ألوان علمها اللون البنفسجي، باستثناء دولة واحدة بس!
ودة بسبب إن زمان كانت صبغة اللون النفسجي غالية جدًا جدًا فمكنش في استخدام ليها إلا محدود للغاية، وكان استخدام البنفسجي في الأعلام الوطنية حتى للدول والممالك هيكون مكلف جدًا لأي دولة
أصل القصة دي بيرجع بينا للزمن لآلاف السنين تحديدًا لـ لبنان في عهد الفينيقيين اللي اتأسست حضارتهم قبل 4500 سنة على ساحل البحر المتوسط
الفينيقيين كانوا شعب بحري بامتياز بيعشق البحر وفي زمنهم كانوا أعظم بحارة في العالم، وكانوا كمان صيادين فكانوا بيصطادوا صدف رخوي اسمه "مريق" قدروا إنهم يستخرجوا منه صبغة بنفسجية منها ابتكروا اللون البنفسجي
تحديدًا في مدينة صور وكمان صيدا كاننوا يعتبروا مراكز تصنيع اللون البنفسجي الوحيدة في العالم
واللي كان اللون دة بيجذب الملوك من العالم القديم عشان يقتنوا ملابس بنفسجية اللون بالذات في مصر وبلاد فارس والرومان
كانوا بيعتبروا إن اللون دة بتحبه الآلهة، واتسمى اللون البنفسجي باللون الملكي لأنه كان معشوق الملوك
لكن صبغة اللون البنفسجي كانت غالية بشكل خيالي أغلى من الدهب نفسه بـ 3 أضعاف.. كان تمن الواحد جرام من صبغة اللون البنفسجي بيعادل 3 جرامات من الدهب النفيس!
غلاء اللون البنفسجي مكنش له علاقة باعتباره كـ"لون مُقدس" مثلًا، لكن عشان طريقة استخراجه وتصنيعه مكلفة جدا جدا جدا
لإنتاج واحد جرام من صبغة اللون بالبنفسجي كان لازم يتم اصطياد 10 آلاف حيوان رخوي لاستخلاص منه قطيرات صغيرة جدًا من الصبغة ومعالجتها وتصنعها
ومثال تاني بيوضح مدى صعوبة الموضوع إن صبغ حتة قماش باللون البنفسجي بشكل كويس كان محتاج 200 جرام من الصبغة، يعني لازم اصطياد 2 مليون حيوان رخوي من البحر!
والمعاناة في الصيد والتصنيع خلى أسعار اللون البنفسجي غالي للدرجة الجنونية دي، لحد ما كل دة اتغير في سنة 1856
في السنة دي نجح شاب عمره 18 سنة وبيدرس الكيمياء من تصنيع اللون البنفسجي لأول مرة في التاريخ بشكل صناعي معملي
الموضوع دة عمل ثورة في استخدام اللون البنفسجي فـ بعد ما كان قبل الوقت دة حكر على الطبقة الغنية والملوك والأمراء بقى عادي ممكن أي حد يشتريه لتوافره فانتشر جدًا
ومع الوقت خلال تقريبًا 50 سنة أسعار صبغة اللون البنفسجي قلت جدًا لحد ما بقت زيها زي أسعار صبغات الألوان العادية التانية
نرجع تاني لأعلام الدول واللون البنفسجي، قولت فوق في بداية القصة إن في دولة وحيدة في العالم هي اللي العلم الرسمي ليها فيه لون البنفسجي وهي دولة دومنيكا وهي عبارة عن جزيرة موجودة في البحر الكاريبي
واللون البنفسجي فيها موجود لتلوين البغبغان الإمبراطوري اللي بيعتبر شعار ورمز وطني في الجزيرة الكاريبية.
المصادر:
- After Skool
- britannica
- livescience
-ancient history encyclopedia
تعليقات
إرسال تعليق