123 سنة على الحرب البريطانية الزنجبارية.. الحرب الأقصر في التاريخ بـ38 دقيقة بس!
من 123 سنة حصلت حرب غريبة كان موقعها في أفريقيا تحديدًا في زنجبار/ زنزبار اللي حاليًا هي جزء من دولة تنزانيا، واتسمت الحرب دي حرب الأنجلو - زنجبار أو الحرب البريطانية الزنجبارية والغريب في الحرب دي إنها بدأت وانتهت في 38 دقيقة بس.. إية قصتها؟
سنة 1890 بريطانيا عملت معاهدة مع ألمانيا للاتفاق سوا على تقسم مناطق شرق أفريقيا مع بعضهم، فـ بريطانيا اختارت إنها تستحوذ وتستعمر زنجبار
في سنة 1893 بريطانيا عينت سلطان عليها مجرد حاجة كدة مجرد لعبة في إيديهم وهو السلطان حمد بن ثويني، وبعد 3 سنين اتوفى السلطان فجأة
السلطان حمد كان له ابن عم اسمه خالد بن برغش كان شايف أنه هو الأحق بالعرش والسلطنة فنصّب نفسه سلطان على زنجبار وأعلن إن بريطانيا ملهاش كلمة عليه وهو الحاكم الفعلي لزنجبار، وبيعتقد إنه هو اللي قتل حمد وسممه علشان طمعان في السلطة
طبعًا الإمبراطورية البريطانية مفيش حد يلوي دراعها خصوصا لو كان شخص مغمور وملهوش سلطة ولا قوة ولا أي شيء علشان تعمله حساب، فكبير الدبلوماسيين أو القنصل البريطاني هدده بالذوق إنه يرجع عن رأيه ويقر بتعية زنجبار للتاج البريطاني
وأداله مهلة لحد الساعة 9 الصبح من يوم 27 أغسطس 1896 لتسلم العرش، لكن خالد رفض تمامًا، فـ نتيجة لدة بريطانيا أعلنت الحرب على خالد، فـ اتحصن بالقصر بتاعه ومعاه 3000 جندي مخلص له، وبريطانيا بعتت له أسطول بحري، بعد الساعة 9 بـ5 دقايق اتهاجم القصر بتاعه بالمدافع واتقتل خلال دقايق أكتر من 500 جندي من قواته
السلطان المحاصر لقى نفسه في حرب غير متكافئة تمامًا وخسرانة فهرب من القصر، وبعد 38 دقيقة بريطانيا وقفت الحرب وأعلنت استيلاءها على القصر وفيما بعد عينت سلطان جديد تابع ليها اسمه حمود بن محمد.. وخرجت من الحرب دي بخساير معدومة مجرد عسكري واحد اتصاب إصابة بسيطة!
تعليقات
إرسال تعليق