لية أذواقنا في الأكل مختلفة؟

دايمًا بيجي في دماغنا أسئلة كدة إنه لية ممكن الواحد يكون بيحب الفسيخ ولا الكوارع مثلًا بس بيكره البامية، أو يكون بيحب البامية والكوارع بس بيكره السبانخ أو شخص تاني العكس تمامًا وهكذا وهكذا؟

الموضوع دة على الرغم من بساطته وإن الإجابة هتكون ما عادي أهي كلها أذواق بس علميًا الموضوع ده "أختلاف أذواق الأكل" اتعمل عليه دراسات كتير من سنين كتير فاتت والخلاصة إن في مجموعة أسباب ممكن يكون في سبب منهم أو أكتر عند الشخص تجاه أكلة معينة، فيكون بيحبها أو مبيحبهاش

- سبب وراثي

ممكن يكون بسبب وراثي فـ بكل بساطة يكون كراهية الفاصوليا موجودة في جينات الشخص اللي واخدها من والده مثلا

- آلية دفاعية تطورية

 ممكن تكون آلية تطورية للدفاع عن الأكلات الخطيرة من زمان جدا جدا، زمان من عشرات آلاف السنين مكنش الإنسان يقدر إنه يميز بين الأكل الصالح للأكل وغير الصالح للأكل فممكن يكون موضوع التذوق دة اتطور للسبب دة، فبطبيعة الإنسان الشخص بيميل للأكلات المسكرة اللي كان زمان بيدور عليها في الجلكوز اللي في النباتات وبيبعد عن الأكلات المُرة

-  النظام الغذائي للأم

 في مفهوم شعبي كدة إن الأم لو أكلت حاجة كتير الطفل هيطلع هو كمان بيحبها ودة طلع حقيقي وعلمي، أثبتت الكلام دة دراسة فرنسية إن الأطفال بداية من عمر سنتين أو 3 سنين بيميلوا لا إراديًا للأكلات اللي كانت أمهم بتحب تاكلها كتير .. مثلًا لو الأم كانت بتحب تدخل التوم في أغلب أكلها فطفلها هيطلع هو كمان بيحب التوم كتير في الأكل وهكذا

- الألوان

 اختلاف الألوان بيأثر على حب وكره الشخص للأكلات أو المشروبات، فمثلا لو الشخص بيحب اللون البرتقالي وبيحب يشرب فانتا برتقال، واتحط له مكانها في الإزازة (من غير ما يعرف) مثلا مشروب هو مش بيحبه بس نفس اللون البرتقالي فممكن مش هيحس بتغيير كتير أو إنه بيكرهه أوي بل أن ممكن عقله يصوره انه هو فانتا برتقال اللي بيحبه بس في حاجة مختلفة ما

وموضوع الألوان دة بتلعب عليه شركات الأغذية والمطاعم وكدة في التسويق لأكلها ومشروباتها


المصد: بي بي سي