هل الصينيين بيكلوا كل شيء.. ودة سبب كورونا؟

خلينا نكون متفقين في البداية أن الأكل "ثقافة" بتختلف من شعب لشعب وحتى داخل الشعب الواحد بتختلف تبعًا لعوامل كتير منها التاريخ والثقافة والجغرافيا والبيئة والسياسة، فالنظام الغذائي مش مجرد ملو بطنّ لكنه فنّ وقصة وتاريخ
بالنسبة للصين، الصين بلد قارية بتضم 1.4 مليار (1,4 ألف مليون) بني أدم على مساحة شاسعة بـ9.6 مليون كم، والمطبخ الصيني هو في الحقيقة عبارة عن 8 مطابخ مختلفة، تبعًا لـ8 أقاليم جغرافية أبرزها شاندونج وسيشوان

وبتتقسم بشكل عام في شمال الصين بتكون الأكلات خفيفة وبتعتمد بشكل أكبر على المعجنات، وفي جنوب الصين بتكون طعمها حار وتقيلة، وعمومًا الأكل الصيني صحي

في الـ 8 أقاليم دي مفيهاش أي أكلات مشهورة ولا بارزة لمكونات غريبة وشاذة زي خفافيش وكلاب وديدان .. إلخ خالص، بل أنها بتتكون بشكل أساسي من الخضراوات و بقوليات فول صويا ورز ومكرونة نوديلز اللي ليها مئات الأنواع في الصين، وبالنسبة للحوم بالأساسي الفراخ واللحم البقري ومعاهم البورك (لحم خنزير) وأسماك
ولو دورنا على أشهر الأكلات الصينية في الأقاليم المختلفة هنلاقيها عادية جدًا منها Dim Sums،  Hot and Sour Soup وغيرهم

- المجاعة الصينية الكبرى

في فترة الخمسينيات مر على الشعب الصيني مجاعة كبيرة جدا مات فيها أكتر من 20 مليون نسمة بسبب السياسيات الغلط للزعيم ماو تسي تونج، وبسبب الجوع النظام الغذائي للصينيين اتغير وأكلوا كل شيء حرفيًا بدايةً من ورق الشجر نهايةً لأن بقى في منهم أكل لحوم البشر لسد جوعه. والبعض بيقول إن النمط دة استمر عند (البعض)من الشعب مع الوقت حتى بعد الازدهار

- إية قصة اللحوم الغريبة اللي بنشوفها؟

اللحوم دي موجود فعلًا لكنها مش منتشرة أبدًا، لكن تعداد الصين المهول بيلعب دور، مثلًا لو بين كل 1000 صيني في واحد بياكل خفاش يعني هيكون عندنا في 1.4 مليون واحد، لو بين كل ألف منهم في واحد بس صور فيديو واحد وهو بياكل ونشره على الإنترنت يعني هيكون عندنا 1.4 ألف فيديو!
أكل اللحوم الغريبة دي موجود كتير تحديدًا وبشكل رئيسي في مقاطعة في الجنوب جواندونج (Guangdong) قريبة من مكاو، والناس اللي بتاكل اللحوم دي وهي غالية السعر مش رخيصة خالص، لأسباب بالأساس هي طبية وشفائية وتجميلية بيعتقدوها زي أن أكل الخفاش مفيدة لبشرة الست،  ودم البط بيقوي المناعة ولحوم الكلاب بيدي طاقة في الجسم
وفي الواقع أن مطاعم تقديم اللحوم دي والحشرات عدها محدود جدًا في أنحاء الصين، وتعتبر أكلات مش مرحب بيها، والبعض اللي بيكلها من باب التطفل وحب المغامرة

- طيب إية حكاية فيديو أكل الخفاش اللي اتسبب في كورونا؟

صاحبة الفيديو الشهير لـ"شوربة الخفاش" هي بلوجر سفر اسمها وانج مينجيون (Wang Mengyun) وهي صينية فعلًا لكنها أكلت الطبق دة في دولة جزيرة بالاو الواقعة في المحيط الهادي، ودة طبق سياحي مشهور في الجزيرة السياحية اللي بيحب يسافر ليها سياح من الصين وفيتنام وشرق آسيا عموما، وبالمناسبة الفيديو قديم اتصور في 2016

والحقيقة الصادمة مفيش ما يثبت لحد دلوقتي إن سبب كورونا هو "أكل" خفاش وسبق ووضحت النقطة دي في بوست سابق هحط لينكه في المصادر تحت
فيروس كورونا مفيش معرفة حقيقية وإجابة أكيدة وواضحة حولين مين هو الحيوان الوسيط الحاضن له واللي نقله من الحيوان للإنسان، وموضوع الخفاش هو "احتمالية" وانتقل بسبب  واقعة عض لإنسان مش أكل وفي "احتمالية" تانية أن الوسيط ممكن يكون آكل النمل الحرشفي

- إية موضوع فيديوهات الأكل المقرف اللي بنشوفه على الإنترنت؟

بالتدقيق والبحث اتضح إن فيديوهات أكل الخفافيش المنتشرة على اليويتوب تم تصويرها في بالاو من جانب سياح صينيين وفيتناميين، وفي صور لسوق حيوانات غريبة من خفافيش وكلاب اتقال إنه في ووهان إلا أنه في الحقيقة موجود في إندونيسيا، ودة مش بينفي وجود الأسواق دي لكنها مش كتيرة وبالشكل المبُالغ دة

وفي نوعيات من فيديوهات لصينيين فعلًا بيكلوا قدام الكاميرا أكل مختلف وبكميات كتيرة كنوع من الاستعراض لجذب المشاهدات لكن دي حالات فردية
نقطة أخيرة.. في كل دول وشعوب العالم فيها أكلات غريبة وغير تقليدية ومحبذة بالنسبة للشعوب غيرها وأشهر مثال عندنا هنا الكوارع. إلخ، ونفس الأمر في الدول المتقدمة نفسها زي الرنجة السويدي Surströmming وسجق الدم البريطاني  Black Pudding، وفي دول آسيا التانية زي تايلاند وفيتنام وكمبوديا في أكلات غريبة زي الفيران الكلاب والخفافيش، لية التركيز مع الصين بس؟

المصادر:
https://bit.ly/39eDlYo
https://bit.ly/2UjUDPN
https://bit.ly/3drXSfj
https://cnn.it/2UjSq6U
https://bit.ly/2UI5wdc
https://bit.ly/2wt46Ly