"مدغشقر".. دولة آسيوية في قارة أفريقيا!

مدغشقر بعتبرها من أغرب دول القارة لأنها بالفعل تعتبر دولة آسيوية من حيث السكان والثقافة واللغة وكل شيء، فـ سكان الجزيرة بيتكونوا من أعراق وأجناس كتير أكبرهم هي القومية الملجاشية واللي اتسمت بيها اسم جزيرة ملجاش زمان قبل ما يتحول اسمها لمدغشقر

الملجاشيين بيشكلوا نسبة 90% من سكان الجزيرة اللي عددهم 25 مليون نسمة. وبيتوزعوا على 20 مجموعة عرقية أكبرهم هما شعب " ميرينا"، وبالأساس هم من شعوب الأسترونيزيين ودي مجموعة عرقية بتنتمي لجنوب شرق آسيا وبيتشكل منها شعوب كتير في دول شرق آسيا

إزاي الآسيويين جُم لأفريقيا وأسسوا دولة "مدغشقر"؟

مدغشقر تعتبر جزيرة مأهولة بالسكان حديثة نسبيًا فالإنسان استوطنها من 1300 سنة بس، وقبل كدة مفيش معلومات عن إن كان في أي تاريخ للجزيرة وحتى هي مجهولة وغير مرتبطة بالتاريخ الإفريقي والصراحة مش عارف إية السبب إن تم استيطان الجزيرة في وقت متأخر تاريخيًا كدة

في 3 آراء علمية حولين إزاي جم الآسيويين للجزيرة الأول بيقول إن السكان الاوائل جُم للجزيرة بواسطة المراكب من بر إندونيسيا لحد ما وصلوا لمدغشقر لكنهم مجهوش بشكل مباشر من بلدهم لمدغشقر واستقروا فيها، ومع الوقت اتوافد غيرهم وغيرهم من الشعوب

وفي رأي تاني بيقول إن الإندونيسيين جُم في هجرة جماعية ضخمة جدًا وواحدة من إندونيسيا لمدغشقر بشكل مباشر من غير ترانزيت واللي بيدعم الرأي دة إن الإبحار عبر المحيط الهندي مش صعب وتيارات الهواء بتساعد على دة، مع العِلم إن المسافة مش قليلة خالص دي 7.5 ألف كيلومتر

وفي رأي تالت للعلماء قالوا إن الهجرة لمدغشقر كانت عبر فترة زمنية طويلة الأول كانت هجرة التجار الإندونيسيين للهند ومع الوقت اتجهوا للغرب لشبه الجزيرة العربية وشوية شوية لساحل شرق أفريقيا لحد ما وصلوا لمدغشقر وشوية وكتر عددهم واستوطنوها ومرجعوش لبلدهم

خلال الفترة دي كانت الجزيرة بالأساس بتتكون من آسيويين بنسبة غالبة من إندونيسيا والجزر المحيطة بيها وهنود وصينيين، وجُم بعد كدة الأفارقة والعرب المسلمين وكانوا بنسبة قليلة وفي مستوطنات ساحلية

المدغشقريين بيتكلموا اللغة الملجاشية على اسم الشعب هي لغة برده بتنتمي للغات الأسترونيزيين والغريب في اللغة دي إنها على الرغم من إنها قريبة من مناطق لغات البانتو في الجزء الجنوبي من قارة أفريقيا لكنها لغة مستقلة وبعيدة عن لغات البانتو خالص بس في بعض الكلمات من البانتو في الملجاشية

ومع الملجاشية بيتكلموا فرنسي في الأماكن الرسمية لأن البلد كانت مستعمرة فرنسية زمان

بالنسبة لأديان مدغشقر هو تقريبا تلت السكان مسيحيين ونص السكان بيتبعوا الأديان التقليدية القديمة والباقيين خليط من مسلمين (موجودين في شمال غرب الجزيرة) وهندوس وأديان تانية ومدغشقر دولة منفتحة متسامحة دينيًا جدًا واجتماعيًا كمان


فـ في مدغشقر في مجتمعات كتير أجنبية منهم هندية وباكستانية وصينية وفرنسية وجزر قمرية وعربية وكتير جدًا تانيين وكلهم عايشين في تعايش وموقعها الفريد ساهم إنها تكون ملتقى ممتاز للتجار ما بين شط العرب وشرق أفريقيا وجنوب شرق آسيا والهند


المصدر:
- Britannica,Madagascar