سفاح وبطل ودواء وبيجيب الرزق.. إزاي البشر بيشوفوا الخفاش؟
إمبارح كان اليوم العالمي للحيوان اللي أثار الجدل حوليه وإتوجهت له الاتهام في التسبب في قتل أكثر من 160 ألف شخص وإصابة 2.3 مليون، وهو الخفاش واللي أتنسجت حولينه آراء وأساطير وحواديت كتير جدًا من قبل كورونا بكتير لآلاف السنين لـ ورا
دلوقتي لما تسمع "كورونا" أول حاجة بتيجي في البال طبق شوربة الخفاش اللي اتقال إنه هو السبب في تفشي كورونا في العالم.. صحيح وأكيد إن العلماء اتفقوا حولين مكان نشأة كورونا وهو مدينة ووهان، لكن في حاجة تانية اختلفوا عليها وهي "احتمالية" ملهاش تأكيد حاسم إن الخفاش هو المتسبب تطور كورونا وانتقاله للإنسان ووقوع كل الفوضى دي
في 26 مارس اللي فات، اتنشرت دراستين في مجلة نيتشر العلمية المرموقة أكدوا إن في حيوان غير الخفاش "ربما" إنه يكون هو الحامل الوسيط اللي نقل الفيروس للبشر، وهو آكل النمل الحرشفي
- الخفاش السفاح
مع ذلك دة مش بيبرر موقف الخفاش إنه "سفاح" إتسبب في ظهور فيروسات سابقة بشكل أكيد زي ماربورج ونيباه اللي اتفشى في أوغندا وماليزيا وبنجلاديش وأستراليا
بجانب إن في "احتمالية قوية" إن الخفاش هو المتسبب في ظهور فيروس إيبولا في الكونغو في السبعينات، وكمان هو السبب في داء الكلب الذي يصيب كل سنة 29 مليون شخص، وكمااااان فيروس سارس اللي اتفشى في 2003
- الخفاش بيجيب الرزق والثروة
الخفاش بيجيب أمراض وكمان بيجيب الخير لشعوب شرق آسيا، ففي المعتقدات الثقافية القديمة في شرق آسيا والصين تحديدًا الخفاش بيربطوه بالفال الحلو، وإنه بيسبب 5 نِعم وهي نعمة الثروة ونعمة الصحة ونعمة العمر المديد ونعمة حب الفضيلة وأخيرًا نعمة الموت الطبيعي
وزي حيوانات كتير الخفاش كان جزء مهم من المثيولوجية الصينية واترسم كتير واتنقشت رسوماته على الخزف من الفازات والأطباق وكدة
- المعتقدات حولين الخفاش في الحضارات والشعوب القديمة
مش الصينيين بس اللي نسجوا اعتقادات حولين الخفاش لكن في شعوب تانية عملت دة سواء بالخير أو بالشر أو بالتقديس، ففي أمريكا الجنوبية الخفاش كان بالنسبة لشعب حضارة المايا قبل 4 آلاف سنة رمز لإله الكهوف وللعالم السُفلي وكانت بتتمارس طقوس بيه
في أوروبا كان فيه اهتمام كبير بالخفافيش، فـ كان في اعتقاد شائع في اليونان وروما زمان بإنك لما تحط نموذج لخفاش تحت المخدة هتضيع الأرق وتعرف تنام كويس!
في العصور الوسطى في غرب أوروبا بدأ إن يكون الخفاش له سُمعة سيئة جدًا جدًا لأنه ارتبط بالسحر الإسود، وكان في واقعة شهيرة حصلت في فرنسا سنة 1332م إنه تم حرق سِت افتكروها ساحرة شريرة لمجرد إنهم لقوا خفاش بيطير فوق بيتها!!
في أفريقيا في دولة ساحل العاج/ كوت ديفوار بيُعتقد إن الخفافيش هي أرواح الموتى بتطير حولين الناس لحد دلوقتي موجودة الاعتقادات دي، وفي مدغشقر مثلًا بيعتقدوا إن الخفافيش هي أرواح السحرة والموتى والمجرمين اللي مش مدفونين لكن في نيجيريا مثلًا ارتبط الخفاش بالخير ومساعدة الناس في الليل
- دم الخفاش دواء للمصريين القدماء
الخفاش ملهوش رسومات كتير على جدران معابد مصر القديمة وأثارها إلا بس في مقابر بني حسن اللي موجودة في المنيا، لأنه مكنش مقدس عندهم لأنهم ربطوه بالظلام بل مكنوش بيحبوه وكانوا بيعملوا تعويذات سحرية في المعابد عشان يطرودوه منها وميسكونهاش ويعشش فيها ويلوث ألوانها
لكن على الرغم من كدة برده المصريين القدماء استخدموا دم الخفاش في الوصفات الطبية العلاجية خاصة للعيون بعد خلطه بدهون البقر
- الخفاش البطل
من الخفاش استلهم الفنان بوب كين والكاتب بيل فينجر شخصية أسطورية بطلة بتحارب الشر وهي "باتمان" أو الرجل الوطواط/ الخفاش وظهرت الشخصية دي لأول مرة في شهر مايو سنة 1939، وبداية من التاريخ دة وتم إنتاج أفلام ومسلسلات كارتونية وسينمائية ودرامية وأعمال الأدبية وغيرها بتدور كلها حولين الراجل الخفاش
المصادر:
-https://bit.ly/2VIUcxX
-https://bit.ly/3biGokg
-https://bit.ly/2XMz903
-https://cnn.it/3eubRSB
-https://bit.ly/3cyqJgD
- https://bit.ly/3etMtw6
تعليقات
إرسال تعليق