لمحة عن تاريخ الأرمن في مصر
الشعب المصري شعب متجانس متكون من قوميات و ثقافات و أعراق كتير جدًا و من ضمن الأعراق و الثقافات دي هم الأرمن
الأرمن وجودهم في مصر مش من بعد هجراتهم لمصر من بعد مذبحة الأرمن في القرن التاسع عشر لكن من زمان جدًا من عصور الدولة القديمة ( عصر الفراعنة ) كان للأرمن هجرات كتير لمصر علي مر التاريخ المصري و كان منحني الهجرات بيزيد و بيقل , كان زاد في العصر البيزنطي و في العصر الفاطمي كمان و اللي كان للأرمن تواجد كبير في مصر و خصوصا بعد إسلام عدد منهم و ترقيهم في مناصب الحكم في مصر حتى إن منهم وصل إنه يكون حاكم مصر وهو بدر الجمالي و اللي ساعد تولي كتير من الأرمن مناصب الدولة العليا في مصر و الوازرات و أتسمت الفترة دي بـ " العهد الأرمني "
بعد إنتهاء العصر الفاطمي قل أعداد الأرمن في مصر بسبب إضطهاد صلاح الدين الأيوبي لهم علشان ولائهم الفاطمي و زادوا مرة تانية في العهد العثماني في مصر و دة بسبب حب السلاطيين العثمانيين للأرمن لإخلاصهم وولائهم و كمان إنهم كانوا تجار شطار و كانوا بيمولوا الدولة العثمانية بالفلوس و العملات الأجنبية
و بعد كدة جيه عهد محمد علي باشا و دة بيعتبر إنه أكتر عهد في تاريخ الأرمن في مصر كان لهم حضور قوي و هاجر لمصر أسرات أرستقراطية أرمنية كتير لأن محمد علي باشا كان بيحبهم برده جدًا و كان كبير الأرمن التاجر و وزير التجارة بوغوص يوفسفيان و اللي بيعتبر إنه مؤسس الجالية الأرمنية في مصر و الأب الروحي لهم كان مقرب جدا لمحمد علي باشا شخصيا و اللي قال في حقه ( ما دام محمد علي و أبناؤه علي قيد الحياة , فلا خوف علي الأرمن الذين لهم الحق في طلب أي شئ مني خاصة أقارب بوغوص و معارفه )
محمد علي باشا إعتمد بشكل كبير جدا علي الأرمن في حكم مصر و خلاهم يتولوا المناصب الكبيرة في البلد زاي ما عمل مع الشركس و الأتراك علي عكس ما عمل مع المصريين اللي خلاهم بس يكونوا موظفيين، لكن كان له معزة و حب خاص للأرمن و كان لهم الرأي و المشورة له في تقريبا كل شئ و خاصة المشروعات الكبيرة الي عملها و اعتمد عليهم في الإقتصاد لأنهم طول عمرهم تجار شطار و بيشتغلوا في الصراف
لكن بعد محمد علي الأرمن عانوا جدًا من اضطهاد خصوصًا من عباس باشا اللي كانوا متعصب ضد الأرمن بالذات و المسيحيين الاجانب عمومًا ( الشوام و اليونانين و الأوروبين و غيرهم ) و شالهم من مناصبهم كلهم و كان شايف ان محمد علي كان متساهل مع الأرمن جدا و المسيحيين على حساب الأتراك و حتى إنه قام بمنعهم في التواجد في بعض المناطق في مصر و عمل حظر لهم من التواجد برا القاهرة و إسكندرية و اللي بيعتبروا أماكن تواجد رئيسي لهم
الأرمن بالرغم إن دايما طول التاريخ عددهم قليل و بسيط جدًا في مصر عمرهم ما تعدوا الـ 5000 في عهد محمد علي اللي بيعتبر هو أكتر عهد كان فيه أرمن في مصر متعدوش الـ 5000 أرمني في مصر
بيعتبروا أقلية إثنية و ودينية و ثقافية لكن بالرغم من كدة إلا إن الأرمن لهم تأثيرات قوية جدًا علي مصر في كل المجالات لأنهم كانوا متقنين جدا و مخلصيين في شغلهم و في كل مكان و مهنة اشتغلوا فيها أتميزوا عن كل العناصر التانية خصوصا في الاقتصاد اللي كانوا في أزمنة من تاريخ مصر هم كانوا ممولين للاقتصاد المصري و المشروعات الكبيرة وكمان كانوا مترجميين و في الفنون و الصحافة و التعليم و الصناعة و كل المجالات و في المناصب الكبيرة في البلد و كانوا صاغة و معماريين حتي في الحرف البسيطة زاي الخياطة و النجارة و و صناعة الأحذية و غيرها
ولهم كنايسهم و مدارسهم زاي مدرسة " كالودسيان " اللي موجودة في بولاق أبو العلا و كونهم بينقسموا دينيًا إلى أرمن أرثوذكس و أرمن كاثوليك فكان لهم كنايس خاصة بيهم اللي موجودة لحد دلوقتي و المطرانية الأرمنية الأرثوذكسية موجودة في القاهرة ( في غمرة ) و في واحدة تانية في الإسكندرية
كان الأرمن بيتركزوا جغرافيا بالإساس في القاهرة خصوصًا في شبرا و الفجالة و العباسية و كمان في الإسكندرية و كان في أعداد أقل في الزقازيق و دمياط و المنصورة و شوية محافظات في الوجه البحري
وللأرمن إسهامات كتير كمان في الصحافة فكانت الصحافة الأرمنية في مصر مزدهرة وأسسوا كتير من الصحف الأرمنية خلال القرن التاسع عشر و كمان كانوا كصحفيين في الجرايد القومية بيكتبوا باللغات العربية و التركية و الأوروبية
وكمان إسهامات في مجالات الفنون زاي السينما و الموسيقي فكان في فرق للأرمن في مصر عالية في المستوي بتنافس الفرق الأوروبية بتقدم مسرحيات أرمنية كتير و أسسوا مسارح منهم مسرح الهوسابير اللي موجود في رمسيس حاليًا
من الشخصيات الأرمنية المعروفة
- نوبار باشا رنوباريان اللي أتولي رئاسة أول حكومة في مصر
- الفنانات إيمان و لبلبة و الطفلة فيروزو أنوشكا و نيلي
- الصحفي و المفكر أديب إسحاق ( 1856:1885) م
تعليقات
إرسال تعليق