مملكة زيمبابوي العظمى.. 5 قرون من الحضارة الأفريقية

دايمًا بيتم الإشارة لأفريقيا إنها قارة متخلفة لا تمت للحضارة بأي صلة، خاصة أفريقيا السوداء مناطق جنوب الصحراء الكبرى

لكن دة اعتقاد خاطئ، كان في حضارات لكن مشكلتها هي عدم التدوين والتسجيل وغيرها من الأمور، وهتكلم في دة بالتفاصيل مع الوقت، ابتديت مع ماناسا موسى إمبراطور مالي، أغنى إنسان في البشرية، اللي اهتم بمختلف أنواع العلوم والفنون منها العمارة وغيرها. ودلوقتي هتكلم عن حضارة في جنوب القارة بتبعد 5600 كيلومتر عن حضارة إمبراطورية مالي وهي حضارة زيمبابوي الكبرى

اسم زيمبابوي معناه بلغة البانتو "مدينة الأحجار"، بيتكون من مقطع "زيمبا" يعني بيوت، و"بوي" يعني الأحجار


قامت الحضارة في مملكة زيمبابوي، بسبب الطفرة الكبيرة في استخراج الدهب زي ما حصل كدة مع حضارة مالي، بالإضافة لاكتشفهم للأحجار الكريمة. ودة كان في السنة 1000 ميلادي لما أسست قبيلة شونا وهي فرع من قبائل البانتو إمبراطورية على مرتفعات هضبة روديسا وسمتها زيمبابوي، وكان عددهم ساعتها تقريبًا 15 ألف نسمة

وبالصدفة اكتشفوا ترسبات الدهب في المملكة دي وكان حُسن استغلالهم لثروات مملكتهم الأثر الكبير في النهضة اللي حصلت، ونشطت تجارة الدهب في جنوب وشرق أفريقيا بسببهم، فكانوا بيبادلوا الدهب بالبضايع مع العرب وكانت مدينة كيلوا الساحلية هي المدينة التجارية الرابطة بينهم وبين بعض

واستمرت حضارة زيمبابوي في السطوع لحد ما بدأت تنحدر مع الوقت وانتهت تمامًا في نص القرن الـ15.

اللي ميز حضارة زيمبابوي العمارة المتطورة لمبانيها وصروحها والهياكل الضخمة اللي كانت زي مقابر لملوكهم، وكمان الابتكارات المذهلة في الأدوات المستخدمة في الحياة والأدوات الحِرفية، فـ لما زارها الأوروبيين "البرتغاليبن في سنة 1800، جالهم ذهول إن في حضارة متطورة في جنوب القارة الأفريقية بالشكل دة، وكمان كانت ليها علاقات قوية منها تجارية مع شعوب كتير خارج القارة، ومش بس مع العرب لكن وصلت للصين وبلاد فارس ومملكة سبأ اليمنية، حتى إنه اتقال أن كان لها تواصل مع الملك داوود

غير أطلال الشواهد والقلاع وغيرها الموجودة في زيمبابوي لحد دلوقتي للمملكة القديمة، في موجودة آثار لها في متحف متروبوليتان للفنون في أمريكا، تم اكتشافها خلال رحلات التنقيب، اللي اثبتت أن مملكة زيمبابوي أتبنت على يد الأفارقة أسلاف شعب "شونا" الأصليين من بدايات القرن الـ11، يعني قبل وقت طويل من بداية وصول المستكشفين الأوروبيين



المصادر:
- أطلس التاريخ الأفريقي، كولين ماكيفيدي
- الموسوعة البريطانية، مملكة زيمبابوي الكبرى
- exploringafrica