إزاي كان مرض الملاريا مفيد لأفريقيا في وقت من الأوقات؟!

من أكتر الحاجات اللي مرتبطة بالصورة الذهنية السلبية تجاه أفريقيا هي الملاريا، والملاريا مرض خطير وفتاك له ضحايا كتير حولين العالم وخصوصًا أفريقيا وفيها أكتر من 90 % من ضحايا المرض، خاصةً في مناطق جنوب الصحراء الكبرى

لكن على الرغم من كدة الملاريا دي كانت في وقت من الأوقات هي السلاح الطبيعي اللي حامى قارتنا السمرا من الأعداء المستعمرين من أوروبا لفترة أكتر من 500 سنة، دة حصل إزاي؟

بداية من القرن الـ15 بدأت الرحلات الاستكشافية الأوروبية "البرتغالية" لأفريقيا، وكانت الرحلات دي مقتصرة بس على السواحل الأفريقية لحد ما اكتشفوا البرتغاليين كل السواحل الأفريقية سنة 1498 برحلة فاسكو دي جاما

بعديه جيه كتير مستكشفين برتغاليين وإسبان وبلجيك، عشان يعرفوا حجم الثروات في القارة وإزاي يستفادوا منها بأفضل طريقة ممكنة

ولما كبرت واتكونت الإمبراطوريات الأوروبية وأساطيلها البحرية الضخمة، اتفتحت عنيها على أن لازم يستكشفوا أراضي جديدة خارج أوروبا، وسعاتها كانت أفريقيا هي الهدف الأكبر

لكن الأوروبيين من البريطانيين والإسبان والبرتغاليين والبلجيك والألمان، مقدروش يقتحموا ويتوغلوا في القارة، وده كان بسبب أن أجسامهم مفيهاش مناعة من الملاريا، فكانت كل معرفة الأوروبيين بأفريقيا من خلال الساحل بس

حتى أنه كان بيتقال أن الأوربي كان بيخاف مجرد ينزل من سفنته، وكان بياخد العبيد والدهب عن طريق التجار ووسطاء ويجيبوهم لحد سفينته

لكن التسارع على تقسيم الكيكة والتنافس بين الدول الأوروبية خلى كل دولة تبني قلاع ومدن على السواحل الأفريقية علشان تقول أن الحتة دي بتاعتي

ومع ذلك برده كان تواجدهم بسيط جدًا لأنهم كانوا خايفين من الملاريا، لأن كان مصير الغالبية العظمى منهم هي الموت بالمرض

حتى أن أغنية كانت بتتردد دايمًا بينهم وهي "إياك إياك من خليج بنين، كثيرون يذهبون إليه وقليلون يعودون سالمين"، للدلالة على مدى الخوف من التوغل في الأراضي الأفريقية

لكن كل دة انتهى في القرن الـ19 تحديدًا سنة 1847 لما اكتشف دكتور إنجليزي وقاية فعالة من الملاريا وهي عبارة عن مشروب اسمه "الكينيين"

ولتجريب الموضوع ده شرب 12 جندي منه ودخلوا أعالي النيجر، لحد ما وصلوا لمدينة لاجوس النيجيرية واستولوا عليها، ودي كانت بداية الفترة الإمبريالية الأوروبية في أفريقيا

ومن ناحية تانية، كان في فعلًا أوروبيين استوطنوا في أفريقيا، قبل الفترة دي هم الهولنديين البوير(حاليًا هما عرقية الأفريكانز) في جنوب أفريقيا، لأن دي كانت المنطقة الوحيدة في جنوب الصحراء الكبرى اللي بتقل فيها الملاريا بشكل قليل جدًا

فـ علشان كدة الهولنديين البوير قدروا يعيشوا فيها من القرن الـ18، لكن كانوا دايمًا في حروب مع القبائل الأفريقية على رأسهم الزولو، وكان لهم دولة اسمها جمهورية أورانج الحرة


المصدر: 
أطلس التاريخ الأفريقي، كولين ماكيفيدي