من عشِّة الصياد لـ قصر الإمبراطور.. حدوتة تطور حي الزمالك
حي الزمالك طبعا من أرقى الأحياء القديمة في القاهرة اللي يعتبر ملاذ للي عاوز يلاقي الروقان والجمال بالذات في الليل "Nightlife"
الزمالك مرّ بتحولات كبيرة جدًا خلال أخر 150 سنة، كان قبل الفترة دي مئات السنين بداية من عهد الأيوبيين ولحد نُص القرن الـ19 مجرد شبه جزيرة فيها عِشش للصيادين
جزيرة الزمالك أو شبه جزيرة الزمالك في الوقت دة مرتين بتحولين مهمين جدًا وغيرها 180 درجة
الأول كان سنة 1869 لما الخديوي إسماعيل قرر اختيار الزمالك أنها تكون مكان بناء القصر اللي سماه الجزيرة عشان يكون مقر إقامة الإمبراطورة أوجيني زوجة إمبراطور فرنسا نابليون الثالث
وقصر الجزيرة الفاخر جدًا دة اتحول بعد كدة لفندق فيرومنت الزمالك واللي من جوه محتفظ بطابعه من النقوش البديعة في السقف والأثاث والتُحف واللي مشفهوش من جوه فاته كتير فعلًا
التحول التاني كان بطله راجل صعيدي من قنا اسمه عبدالمنعم محمدين جيه سنة 1897 عاش في الزمالك اللي كانت وقتها فيها حيوانات مفترسة وأحراش وكانت أرض غير مؤهلة للزراعة على الرغم من إنها في وسط النيل
المهم إن عم عبدالمنعم أخد حتة أرض وزرعها ولما المشروع نجح معاه عمل زي كل أهل الصعيد إنه بعت يجيب قرايبه وبلدياته من البلد يشتغلوا معاه ويساعدوه في زراعة الأرض
شوية بشوية الزراعات اتوسعت أكتر وأكتر وبدأ العمران يدب في جزيرة الزمالك
واللي كانت شبه جزيرة الزمالك لأن الفرع الغربي من النيل في الزمالك مكنش موجود في القرن الـ19 وكانت أرض متوصلة بالعجوزة وإمبابة
سنة 1877 اتحفر الفرغ الغربي واتبنى ىكوبري اسمه البحر الأعمى وفضل بيستخدم لحد سنة 1914 وتم بناء كوبري بداله هو كوبري الجلاء بعد جلاء الإنجليز عن مصر
واللي سماه الناس باسم "كوبري بديعة مصباني" عشان كان عندها كباريه جنب الكوبري ومع الوقت اتغير اسمه لكوبري الجلاء اللي هو موجود حاليًا
طبعًا مع الوقت الزمالك اتحولت من مكان عشوائي في عِشش لمنطقة أرستقراطية بتجمع النبلاء والأمراء والأثرياء والفنانين والمشاهير زي يوسف شاهين وفاتن حمامة وإسماعيل ياسين
بجانب قصر الجزيرة في قصور كتير زي قصر عائشة فهمي وقصر هوج، وكمان في استراحة الملك فاروق
فـ كل حتة وشارع ومبنى في الزمالك هو تاريخ ودة من الحاجات اللي بتخليني أحب الزمالك
المصادر:
- البوابة الإلكترونية لمحافظة القاهرة
- صفحة تراث مصري
- https://bit.ly/3jObEfH
تعليقات
إرسال تعليق