1689 سنة إسكندرية (2/2).. نموذج للتنوع الثقافي
قسطنطين كڤافيس
"وعاشرت فيكي الخواجة يَني.. إجريجي لكن مصراوي جِنّي".. الكوبليه دة في تتر مسلسل زيزينيا بصوت الفنان محمد الحلو بعتبره بيلمس حقيقة تاريخية واقعة على أرض الإسكندرية، وهي التمازج الثقافي
حصل التنوع دة بسبب الموقع المهم جدًا للإسكندرية الرابط بين مصر وأفريقيا من جهة واليونان وأوروبا والشام من جهة تانية
فـ كانت الإسكندرية هي محطة توافد رئيسية عبر التاريخ لليونانيين تحديدًا وكمان الإيطاليين والقبارصة والصقليين والشوام والأرمن وغيرهم وغيرهم
فـ كانت حلقة وصل بين البيئة والثقافة المصرية والثقافة اليونانية.. مدينة بهوية مزدوجة، واليونانيين يعتبروا من أكتر المكونات اللي أثرت في مصر خصوصًا في مجالات الاقتصاد والتجارة
ودة بسبب تمكنهم من الإبحار وعِلمهم باللغات، وزاد عددهم في مصر خاصةً خلال فترة حكم محمد علي باشا وقربهم له وكان منهم المترجمين له
وكان في أكتر من 140 ألف يوناني مصري كانوا موجودين في مصر لحد بدايات الخمسينيات وعددهم قلّ تدريجيًا بعد انقلاب 23 يوليو وموجة العداء ضد المصريين من أصول أجنبية في مصر ومنهم اليونانيين
وكان من أبرز اليونانيين السكندريين الشاعر الكبير قسطنطين كڤافيس اللي اتولد في شارع شريف في الإسكندرية
ووالديه يونانيين من أصل تركي هاجروا للإسكندرية في نص القرن الـ19، وكان والده من الطبقة الأرستقراطية اليونانية في مصر وصديق للخديو إسماعيل
وكان بيكتب قصائد كتير تقريبًا 70 قصيدة سنويًا، وكانت أشعاره بتتمحور حولين اليونان الكلاسيكية والحضارة الهلينستية والأدب السكندري
وبجانب اليونانيين السكندريين، كان في الأرمن اللي كانت بتضم أكبر كتلة منهم بعد القاهرة بنسبة 20% من أرمن مصر البالغ عددهم في بداية القرن الـ19 بـ2000 نسمة
وكان كبير الأرمن بوغوس بك يوسفيان ناظر ديوان التجارة (وزير التجارة) في عهد محمد علي باشا من الأرمن السكندرييين ودعم تواجده وجود الأرمن بشدة وتم بناء مدارس أرمنية في عهده بالإضافة للكنيسة الكاثوليكية الأرمنية
الشوام (فلسطينيين/لبنانيين/سوريين) كانوا مجموعة ثقافية بارزة برده في الإسكندرية، وهاجروا ليها عن طريق البحر من قديم الزمن، لكن كان لهم تواجد ملحوظ في الإسكندرية بداية من القرن الـ16
وزاد عددهم برده في عهد محمد علي باشا، وكانت الإسكندرية تالت أكبر مدينة بعد القاهرة ودمياط بتضم شوام واشغتلوا في المجالات الحرفية اليدوية والتجارة وفي الميناء
وممكن نذكر أبرزهم هو المخرج العالمي يوسف شاهين اللي بتنتمي أسرته لمدينة زحلة اللبنانية
المصادر:
- تاريخ الحالية الأرمنية في مصر، محمد الإمام
- الشوام في مصر، السيد عبد المقصود
تعليقات
إرسال تعليق