هل للموسيقى نشوة؟
النشوة هي أوج ذروة السعادة واللذة اللي بيتعرض ليها الإنسان في لحظة أو وقت ما خلال تعرضه لمُسبب غير اعتيادي له، وغالبية الأوقات بترتبط النشوة بالجنس لكن ليها مُسببات تانية وهي المزيكا
في دراسات علمية اتعملت كتير جدا حولين مفهوم "النشوة الموسيقية" وإنه هل فعلًا ممكن إنسان يوصل لذروة النشوة لما يسمع موسيقى، وإمتا وإزاي وليه؟!!
النشوة الموسيقية بتحصل لما شخص بيستمع لمقطوعة موسيقية أو أغنية بكامل حواسه وبتسبب له ابتهاج شديد والعلماء حددوا بعض الأوقات المعينة اللي بتحصل فيها النشوة
وهي خاصةً لما شخص يتفاجئ بروعة أداء مُغني بشكل غير متوقع، أو كمان لما يكون في مجموعة عازفين وواحد منهم يعزف منفرد أو بلحن فياض بالمشاعر
الحالتين دول اتصنفوا إنهم من أكتر الحالات اللي ممكن تسبب النشوة الموسيقية للشخص ومش لأي شخص فقالوا إن بس 5% من البشر اللي ممكن يوصلوا للنشوة دي
النشوة الموسيقية بتحصل في هيئة قشعريرة في الجلد بتتسمى "القشعريرة الجمالية" وكمان شعر الجسم بيقف مع سرعة خفقان للقلب وتبطء التنفس اللاإرادي بأقل من المعدل الطبيعي
والعلماء قالوا إن سبب كل الموضوع دة إن الموسيقى بالأساس بتساعد على زيادة إفراد هرمون الدوبامين اللي معروف باسم "هرمون السعادة"
فـ بيخلي الإنسان سعيد وكل ما يتم إفرازه أكتر بسبب جمالية المزيكا كل ما بيوصل للنشوة أكتر وأكتر لأنه كمان ناقل عصبي بينقل الإشارات للمخ والجسم
والنشوة بتخلي في تغيرات في كهربا الجلد والخلايا العصبية بتتأثر كمان
زي ما ذكرت فوق إن مش كل البشر ممكن يوصلوا للمتعة الموسيقية لكن نسبة قليلة منهم
والنسبة دي بيكون ليها صفات معينة وهي إنهم بيحبوا التنوع وبيقدروا الجمال والخيال والإدراك المعرفي
وكمان المشاعر والعواطف العميقة والصفة الأهم هي إنهم منفتحين على التجارب فـ كل دة بيخليهم يندمجوا ذهنيًا مع المزيكا ويحصلهم الرعشة أو النشوة الموسيقية
المصادر:
- sciencealert
- ibelieveinsci
- webteb
تعليقات
إرسال تعليق